 |
 |
|
  
Sun dies nòdidas pro su Sinn Féin chi afestat s’anniversariu sou de chent’annos de cuntierras. Sa ‘green paper’, una costitutzione noa pro jòmpere a pònner umpare Nord e Sud e fraigare un istadu soberanu de totu sos irlandesos. de Juanne Pancràtziu Deperu e Dàriu Piga
Céad Bliain ar son na saorise (imprentadu da-e su Sinn Féin; Dublinu; 2006). Iscritu in limba gaèlica cheret nàrrer ‘chent’annos de cuntierras’, riferidu a su partidu istòricu de s’Irlanda, su Sinn Féin chi traduidu leteralmente est: nois matessi. Su libru bessit pro cummemorare su chentenariu de sa fundatzione de unu de sos partidos istòricos chi ant permitidu s’indipendentzia de sa Repùblica de s’Irlanda in d’unu momentu istòricu de importu mannu pro s’isula de sos paris birdes e de su trifozu ca da-e su Sinn Féin est istadu presentadu unu documentu jamadu green paper cun s’obietivu de aunire sa Repùblica de s’Irlanda-éire cun sa perra de su nord de s’isula, chi como est intregada a su Renniu de Inghilterra. Si tratat de unu triballiu editoriale pro fàgher connòscher s’istoria de su republicanismu irlandesu e sas cuntierras chi bi sunt istadas in su tempus passadu e no solu. Su letore podet agatare novas a subra s’isfida polìtica noa chi est istada betada a tota sa sotziedade irlandesa intrea. “Unu bisu (su nostru) chi si podet mudare a prozetu polìtigu reale in su tempus benidore” gai narat Gerry Adams, cabu istoricu de su partidu republicanu irlandesu. Isse est cumbintu chi diat pòder esìster un’Irlanda aunida chena làcanas divisorias e chena cuntierras peruna de fide. custu status nou si podet jòmper in manera democràtiga, cun sa paghe e cun sa no-violentzia. Si tratat duncas de unu caminu de amistade nou ue sos Orange e sos Green diant pòder cundividere una repùblica noa aunida in s’amistade. Sa dificultade pius manna pro jòmpere a custu bisu est rapresentadada da-e sos unionistas britànnicos chi cherent su nord-irlanda a suta de sa corona inglesa. Una cuntierra polìtiga ue tramas de problemas mannos de fide s’intritzant cun oriditos de interessos econòmicos. Pro cumprèndere totu custu bastat a pensare primu ‘e totu a su fatu chi su fanatismu religiosu segat in duos cantos sa perra nord de s’isula e chi in Belfast, tzitade pius manna de su nord, esìstint sos bighinados irlandesu-catòlicos e inglesu-protestantes. A totu custu b’at de pònner puru sos problemas econòmicos inerentes a su fatu chi si tratat de unu logu ricu de materias primas e petroliu.
Jassos web abaidados: www.sinnfein.com 
|
