Su 23 de abrile, est festa nòdida in Catalugna: est sa die de su patronu, Sant Jordi.

Est una festa chi dae semper at tentu unu caràtere fortemente natzionalista, de rivendicatzione de sa catalanidade in totu sos aspetos suos, de sa limba e de sa cultura catalana in antis de totu. Sos edifìtzios pùblicos esponent sa bandera catalana, les cuatre barres, e finas in barcones e bentanas de sas domos non mancant banderas.

Antigamente custa fiat puru sa die de sos innamorados e s'òmine regalaiat a sa fèmina una rosa, sinnale de amore. Custa traditzione est semper bia e in totu sas biddas e tzitades de Catalugna si podent bìdere sas carreras prenas de bancos in ue si bendent rosas.

Un'àtera traditzione, cun unu sèculu de istòria, est sa de comporare, e mandigare in die de oe, unu durche, naradu durche de Sant Jordi.

Ma sa traditzione prus bella est però sa de comporare unu libru, pro lu regalare o pro si lu regalare. Est un'ispetàculu ispantosu su de bìdere sas carreras prenas de gente ammuntonada a inghìriu de bancos a còlumu de libros. Paret chi los diant de badas. Pro chie leghet pagu, oe est sa die prus indicada pro si comporare unu libru e pro sos prus amantiosos de sa letura oe est s'ocasione pro chircare una novedade, pro si comporare un'àteru libru o pro lu regalare, o simpremente pro fàghere duos passos in una tzitade in festa, allegra, trasformada in lìbreria.

G.Ledda

 

Da-e su jassu web: www.tempusnostru.it