Firmadu acordu triennale

Sos responsàbiles de sa polìtica linguìstica de sos guvernos de Catalugna, Paisu Bascu e Galìtzia Miquel Pueyo, Patxi Baztarrika e Marisol López ant firmadu, in su Cungressu de sos deputados, un'acordu de collaboratzione in ue si sunt impignados a li pedire a s'istadu unu tratamentu prus giustu pro custas limbas giai chi su 40% de sa populatzione faeddat un'idioma chi no est su castillianu. Sa durada de s'acordu est de tres annos prorogàbiles, tempus chi ant a dare amparu a sos faeddos issoro in s'Amministratzione istatale e in s'Unione europea. Ant finas a promòere s'insignamentu de s'istòria e de sa cultura locale in sas limbas minoritàrias, comente previdet sa Carta Europea de sas Limbas Regionales o Minoritàrias. In prus sas tres comunidades ant a intercambiare esperièntzias e istrategias de sensibilizatzione de sa populatzione pro sa normalizatzione linguìstica e pro sa promotzione esterna de sos produtos culturales issoro. [gmr]

 

Da-e su jassu web: www.tempusnostru.it